Terno djiljarno Almir Agić: O reslipe si e vazdinjale šoresa vaćaren – “Va, me sem Rrom thaj barikano sem pala gova ”

Vaćaripe e terne djiljarnesa andaro Ilijaš paša Sarajevo mothovel kaj amen vaćaras e terne manušese savo si-les barvalo telento thaj bari perspektiva. Agić si džanglo dženo savo mangel džanglipe thaj reslipe, savo mangel te ulajvel piro pozitivno gndipe e averenca, a palpale e terne Rromenca. 

Ando vaćaripe pala portalo Newipe vov phenel e pire džuvdipese, literarnikane ćerdipese, e Rromengi situacija e amalipeste thaj kataro aver interesantnikane tema. 

„Mrne tekstura si numaj mrno dikhipe pe them, pe svjeto.   A o them si, sar tumen džanen, vi kamipe vi xoljardipe, vi dukh vi asape. Romasarav kataro sa gova, romasarav kataro džuvdipe.  Poezija, proza, lirika, epika, novele, romani“, mothoda amen gova džanglo čhavo. 

Haćarda kaj e sikamne ande fundeski škola anglune putarde lesko talento thaj džanglipe pala romasaripe, numaj vov na lija gova ozbiljno, sa džiko injato klaso. 

„Ando injato klaso, džanglem kaj naj sem dosta kompetentno, numaj astardem te romasarav jekh teksto pala regionalno takmičenje, ćhelavipe pe tema  ‘Dan logoraša’.  Kana istardem angluno than, džanglem kaj gova si ande mande. Athoska gova me astardem te romasarav gaja, pala pes. Tekstura save romasarava šaj te drabaren numaj von save si mande majpaše.  Familija thaj pokajekh amala.  Gova si dženura save si therdine pala mrne avere tekstura, numaj mora te dav paćiv pala paćivale dženura sar pala lilvarno, pisco Semir Spahić, profesorka pala literatura Amra Dačić thaj aver. Lengo inćaripe dija man vadžaj milje romasardine slovura“, vaćarda Agić.

Sar vov dija vorba pride, leske tekstura si sajekh numaj lestar, a sasto inćaripe savo si-les del leske vi anglune slova ande knižka, ando lil.

„Akana romasarav piri angluni knižka, thaj čačes, mangav te iklistav la thaj te lundjarav e romasaripesa, ako si kote o šajipe pala sa gova.   Mrno mangipe si te jekh djive avav pindžardo pisco ando regiono.  Uzo romasaripe, mangav te astarav cikno bizniso pala kirisaripe e robako.  Te gova ćerava, mora te astarav thaj te therav buteder džanglipe thaj zumadipe  uzo maškarutni škola savi gatisardem, smjero  ‘Operater na CNC mašinama’. Sajekh ćerav e goveste“, vaćarda.

Džiko akana Agić gatisarda obuke/siklipa sar fundeske džuvdipeske bižajipa, bižajipe pala bućako lenipe,  obuka/siklipe pala bizniso thaj marketingo thaj o kurso pala engleski čhib.   E avindipeste mangel te ćerel vozački ispit pala B thaj C1 kategorija, thaj gova si akana ando proceso.   Athoska, o plano si te del piro biznisesko plano ande državne ustanove thaj pala varesave organizacije, sar bi ćerela lačhipe save si but bare pala lesko reslipe.   

„Va, pala gova plano trubuj baro kapitalo, numaj ka ćerav sa gova.  Džanav kaj ka avel but vazdipa thaj peripa sar pala man sar individua gadija pala diskriminacija krzo savi džan Rroma.   Haćarav sar o reslipe sako mrno maripe, sar maripe opro diskriminacija, maripe opro  ‘zakono’ savo na avilo paćavdo sar trubuj te avel.  Haćarav sar o reslipe sako maripe pala amare čačipa.  Manušenge čačipa.   Haćarav sar o reslipe sako maripe, sako vazdipe e fundestar kaj avilam čhudije.  Mrno godjaveripe si kaj gova si majbaro Rromengo problemo.  Amen sam lačhe e govensa so si dino amenge. A dino si amenge ‘prljav obraz / melalo muj’. Te dikhas kaj si gadija sar si, sose ažućaras.  Sose na astaras gova djinavas / peras amen.  Sose na maras pala gova so si amaro, pala gova so peras amen.  A peras amen sa.  Peras / djinavas amen o ćher, obrazovanje, peras amen javno prevozo bizo kale dikhipa, peras amen reslipe“, vaćarda Agić.

Sar vov dija vorba, naj si pharo te resen, pharo si te pinžaren reslipe. 

„Paćav kaj ando sako dženo perel gova reslipe.  Numaj trubuj les pindžaren thaj istarden.  Kote si mrno savjeto / turvinjipe pala terne Rroma vi Rromnja.   Pindžaren pes, džan ande pire xara, numaj gadija šaj te avel zurale koring ciknorre manuša. Zuralen korkore peske, kaj šaj te maren pes e šejenca save si čhudine pe amen.  Ćeren gova pala pes, ćeren gova pala šukar avindipe.  O reslipe si e vazdinjale šoresa vaćaren ‘Va, me sem Rrom thaj barikano sem pala gova“, agorisarda Agić.

(Tekst sa bosanskog, na romski jezik prevela Dr. Hedina Tahirović-Sijerčić)